បញ្ចេញហ្សាកាត់ហ្វីត្រះជាតម្លៃអាហារ(លុយ)គឺជាការយល់ឃេីញរបស់អូឡាម៉ាកមួយចំនួនតូច រីឯការបញ្ចេញហ្សាកាត់ហ្វីត្រោះជាអាហារគឺជាបទបញ្ជារបស់រ៉សូលុលឡោះ ﷺ ដោយផ្ទាល់(صحيح البخاري ١٥٠٣)។
រ៉សូលុលឡោះ ﷺ បានប្រេីឱ្យយេីងបញ្ចេញហ្សាកាត់ហ្វីត្រះជាអាហារ(صحيح مسلم ٩٨٤) ហេីយសហាហ្ពាត់ទាំងអស់មិនធ្លាប់បញ្ចេញវាជាតម្លៃអាហារ(លុយ)ម្ដងណាឡេីយ។ នៅក្នុងម៉ាស្ហាប់ស្សាហ្វីអុី ការបញ្ចេញហ្សាកាត់ហ្វីត្រះជាតម្លៃអាហារ(លុយ)គឺមិនសះនិងមិនត្រឹមត្រូវឡេីយ(المجموع للنووي ٦/١٤٤) ដូចគ្នាផងដែរនៅក្នុងម៉ាស្ហាប់ម៉ាលីកី(التاج والإكليل للموافق ٢/٣٦٦) និងម៉ាស្ហាប់ហាំបាលី(المغني لابن قدامة ٣/٨٧)។
អាហារអ្នកស្រុកយេីងគឺអង្ករ ហេីយឆ្នាំនេះមុហ្វទីកម្ពុជា ឧកញ៉ា សុះ កំរី នៅក្នុងគេហទំព័រហ្វេសបុកផ្លូវការ លោកបានកំណត់យកទម្ងន់អង្ករដែលមនុស្សម្នាក់ត្រូវចេញហ្សាកាត់ហ្វីត្រះគឺមានចំនួនបីគីឡូក្រាម។ ប៉ុន្តែតេីអ្នកដែលហ្សាកាត់ហ្វីត្រះជាលុយ យ៉ាងម៉េចទៅវិញ? ប្រសិនបេីគាត់ជាអ្នកសិក្សារៀនសូត្រត្រឹមត្រូវ យេីងសង្ឃឹមថាគាត់មានជំហរយល់ឃេីញដូចម៉ាស្ហាប់ហាណាហ្វីដែលបានអនុញ្ញាតិឱ្យចេញហ្សាកាត់ហ្វីត្រះជាតម្លៃអាហារ(លុយ)។ តែបេីទង្វេីបែបនោះកេីតឡេីងដោយសារធ្វេីតាមអារម្មណ៍ខ្លួនឯង(ដោយគ្មានចំណេះដឹងជាមូលដ្ឋាន) ឬគ្រាន់តែចង់ស្រណុកស្រួល ឬដោយសារចង់ឈ្នះចាញ់គ្នាជាដេីម នោះគាត់កំពុងធ្វេីរឿងដែលខាតបង់ធំណាស់។
នៅក្នុងសាសនាឥស្លាម ហ្សាកាត់មានច្រេីនប្រភេទណាស់ អ្នកចិញ្ចឹមសត្វត្រូវហ្សាកាត់ជាសត្វ អ្នកដាំដំណាំត្រូវហ្សាកាត់ជាផលដំណាំ អ្នករកសុីត្រូវហ្សាកាត់ជាលុយកាក់ រីឯហ្សាកាត់ហ្វីត្រះវិញរ៉សូលុលឡោះ ﷺ បានប្រេីឱ្យយេីងបញ្ចេញហ្សាកាត់មួយកន្តាំងអាហារដូចជាល្មេី ឬអង្ករជាដេីមដែលមុហ្វទីកម្ពុជាយេីងបានកំណត់ជាទម្ងន់ស្មេីនឹងបីគីឡូក្រាម។ ហ្សាកាត់ហ្វីត្រះជាអាហារ(អង្ករ) គឺតម្រូវឱ្យយេីងឬកូនចៅយេីងនាំអង្ករចេញពីផ្ទះសំដៅទៅរកផ្ទះអ្នកក្រ រូបភាពបែបនេះបានបង្ហាញពីការចេះជួយគ្នានិងបានផ្ដល់មេរៀនល្អមួយដល់កូនចៅអ្នកកាន់សាសនាឥស្លាមគ្រប់រូបតាមរយៈទង្វេីចាស់ទុំក្នុងភូមិដោយផ្ទាល់។
