១. ពាក្យអារ៉ាប់ كُوَيْت ជាភាសាអង់គ្លេស Kuwait ពីមុនគេធ្លាប់សរសេរជាភាសាខ្មែរថា «គុយវ៉ែត» ក្រោយមកក្រសួងការបរទេសកម្ពុជាសម្រេចប្ដូរមកសរសេរជា «កូវ៉ែត» វិញ។
២. សម្រាប់ប្រជាជនម៉ាឡេសុីឬឥណ្ឌូនេសុី សំនៀង «កូវ៉ែត» គ្រាន់តែជាឈ្មោះប្រទេសដែលមានប្រជាជននិយាយភាសាអារ៉ាប់មួយស្ថិតនៅមជ្ឈិមបូព៌ា។ សម្រាប់ពួកគេ «កូវ៉ែត» ជាប្រទេសដែលមានព្រំប្រទល់ជាប់រាជាណាចក្រអារ៉ាប៊ីសាអូឌី អុីរ៉ាក់ និងឈូងសមុទ្រពែរ្សក្នុងឧបទ្វីបអារ៉ាប់ និង ដែលមានចំនួនប្រជាជនប្រមាណ 1.39 លាននាក់ ភាគច្រេីនលេីសលប់ជាអ្នកកាន់សាសនាឥស្លាម(ម៉ាស្ហាប់ហាំបាលី)។ ខុសឆ្ងាយពីមូស្លឹមស្រុកយេីង ដែលតែងចងភ្ជាប់ពាក្យ «កូវ៉ែត» ទៅនឹងពាក្យវ៉ះពីឬដែលច្រេីនសំដៅដល់គោលជំនឿមួយដែលពួកគេយល់ថាមិនល្អត្រឹមត្រូវ។
៣. មូលហេតុដែលធ្វេីឱ្យពាក្យ «កូវ៉ែត» ស្ដាប់ទៅទេីសត្រចៀកដល់គ្នាយេីងជាច្រេីន គឺដោយសារសាលារៀនមួយដែលបង្កេីតឡេីងដោយសមាគម جمعية إحياء التراث (សមាគមពង្រស់ឡេីងវិញនូវកេរដំណែលឥស្លាម) ជាសមាគមដែលមានសាខាធំនៅប្រទេសកូវ៉ែត។ សមាគមនេះបានមកដល់ស្រុកខ្មែរដំបូងឆ្នាំ ១៩៩៣ កាលនោះលោក ម៉ាត់ លី បានស្នេីទៅដល់លោក Yamal Yusof Hatat ដែលជាមេដឹកនាំថ្នាក់តំបន់របស់អង្គការ ឱ្យបង្កេីតសាលារៀនសម្រាប់ក្មេងកំព្រា។ ឆ្នាំ ១៩៩៦ សមាគមបានបង្កេីតសាលាបឋមសិក្សាមួយនៅចោមចៅទីក្រុងភ្នំពេញ ក្រោយមកបានផ្លាស់ប្ដូរទៅជាអនុវិទ្យាល័យនៅឆ្នាំ ២០០០ និងបានក្លាយទៅជាវិទ្យាល័យនៅឆ្នាំ ២០០៣ ដែលមានឈ្មោះថា វិទ្យាល័យរស្មីអុីស្លាមកម្ពុជា និងដែលគេហៅតៗគ្នាមកថា សាលាគុយវ៉ែត។ ស្របពេលដែលសមាគមអន្តរជាតិអ៊ុំអាល់គូរ៉ា បានបង្កេីតវិទ្យាស្ថានអប់រំ(សាលារៀន)មួយនៅឫស្សីជ្រោយ ឆ្នាំ ១៩៩៨ (ដែលត្រូវគេចោទប្រកាន់អំពីភេរវកម្ម ហេីយត្រូវបានបិទវិញនៅឆ្នាំ ២០០៣ បន្ទាប់មកប្ដូរឈ្មោះទៅជា មជ្ឈមណ្ឌលឥស្លាមកម្ពុជា នៅឆ្នាំ ២០០៤) ដែលមានទំនោសាឡាហ្វីដូចទៅនឹងសាលាគុយវ៉ែតផងដែរនោះ ក៏ជាទឡ្ហីករប្រកែកមិនបានក្នុងការរួមចំណែកផ្សព្វផ្សាយពាក្យ «គុយវ៉ែត» ឱ្យកាន់តែសុះសាយទៅដល់សហគមន៍ខ្មែរឥស្លាមនៅទូទាំងព្រះរាជាណាចក្រកម្ពុជា។
៤. «សាឡាហ្វី»ដែលគោលជំនឿមួយចំនួនមានលក្ខណៈខុសគ្នាទៅនឹង«អាស្សាអុីរ៉ោះ»ដែលជាគោលជំនឿរបស់ខ្មែរឥស្លាមភាគច្រេីននៅស្រុកខ្មែរកាលនោះ ស្របពេលដែលហ្វីកោះក្នុងម៉ាស្ហាប់ហាំបាលីដែលមានហូកំមួយចំនួនខុសប្លែកពីហ្វីកោះស្សាហ្វីអុី ដែលជាម៉ាស្ហាប់នៃប្រជាជនខ្មែរឥស្លាមភាគច្រេីននៅសម័យនោះ គឺជាមូលហេតុធំបំផុតដែលធ្វេីឱ្យពាក្យ «គុយវ៉ែត» ប្រែក្លាយទៅជាមិនល្អស្ដាប់សម្រាប់គ្នាយេីងជាច្រេីនដែលប្រកាន់ខ្ជាប់ជាមួយគោលជំនឿអាស្សាអុីរ៉ោះនិងហ្វីកោះស្សាហ្វីអុីនៅសម័យនោះ និងបន្តមកដល់សម័យនេះថែមទៀត។ ខណៈដែល «កូវ៉ែត»ឬ«គុយវ៉ែត» គ្រាន់តែជាឈ្មោះប្រទេស និងមិនជាប់ទាប់ទងអ្វីទៅនឹងគោលជំនឿសោះឡេីយ។
៥. ស្របពេលដែលគ្នាយេីងជាច្រេីនមិនពេញចិត្តពាក្យ គុយវ៉ែត ជាក់ស្ដែងប្រជាជននៅប្រទេសកូវ៉ែតឯនោះវិញបាននាំគ្នារាយអង្គាសប្រាក់កាក់រាប់រយពាន់លានដុល្លាដេីម្បីផ្ដល់ជាជំនួយមនុស្សធម៌ទៅកាន់អ្នកកាន់សាសនាឥស្លាមជុំវិញពិភពលោក តាមរយៈសមាគមជាច្រេីនក្នុងប្រទេស។ មូស្លឹមស្រុកយេីងក៏ធ្លាប់បាន និងកំពុងទទួលបាននូវជំនួយទាំងនោះជារៀងរាល់ឆ្នាំផងដែរក្នុងរូបភាពជាម៉ាស្ជិទ សូរ៉ាវ សាលារៀន មន្ទីពេទ្យ ផ្ទះសម្បែង អាហារូបករណ៍ ម្ហូបអាហារ និងផ្សេងៗជាច្រេីនទៀត។
